Семейде қала әкімінің сайлауы өтті : алғашқы тікелей дауыс беру нәтижелері күтілуде
Облыс орталығының әкімі лауазымына үш кандидат бақ сынады: Көкпекті ауданының әкімі Адлет Кожанбаев, қалалық мәслихаттың бұрынғы төрағасы Айболат Бекжасаров және Геодезия, картография және құрылыс жоғары колледжінің директоры Қаныш Төлеуов.
Қала бойынша барлығы 128 сайлау учаскесі жұмыс істеді. Абай облыстық аумақтық сайлау комиссиясының мәліметінше, дауыс беру үдерісі бақылаушылар мен сенімді өкілдердің қатысуымен қалыпты жағдайда өтті. Учаскелер жабылған соң бірден дауыс санау басталды, ал алдын ала қорытындылар учаскелік хаттамалар толық өңделгеннен кейін жарияланатын болады.
Барлығы үшін және әркім үшін
Сайлау күні Семейде ерекше назар мүмкіндігі шектеулі азаматтардың дауыс беруіне аударылды.
Олар үшін барлық қажетті жағдай жасалған: учаскелерде пандустар, арнайы кабиналар мен жәшіктер орнатылды, көлікке қолжетімділік қамтамасыз етілді. Комиссия мүшелері қажет болған жағдайда көмек көрсетеді, ал өздігінен келе алмайтын азаматтар үшін үйден дауыс беру мүмкіндігі қарастырылған.
Арнайы қажеттіліктері бар сайлаушылардың айтуынша, сайлауға қатысу – олардың тең құқықтары мен мүмкіндіктерін білдірудің, сондай-ақ қаланың дамуына өз үлесін қосудың көрінісі. Осылайша әрбір тұрғынның дауысы маңызды.
Қала мен елге танымал тұлғалар да семейліктерді сайлауға белсенді қатысуға шақырды. Өйткені бұл жолы қала басшысын тікелей өздері таңдау мүмкіндігі берілді.
Мәселен, «Елімай» футбол клубының ойыншылары мен жанкүйерлері өз таңдауларын жасауға үндеді.
Кәсіпкер Ольга Р. әр сайлауға тұрақты түрде қатысып келеді:
«Менің ойымша, әр адам сайлауда және референдумда өз азаматтық ұстанымын білдіруі тиіс. Өйткені қоғамдық келісім мыңдаған жеке пікірдің қосындысынан қалыптасады», — деді ол.
Алдын ала деректер
«Сайлаушылардың келуі жөніндегі ақпарат заңға сәйкес тек келесі күні беріледі. Дауыс беру аяқталған соң әр учаскеде санау жұмысы басталды. Онда бақылаушылар мен сенімді өкілдер қатысып отыр. Барлық мәліметтер қалалық аумақтық комиссияда біріктіріледі, бұл белгілі бір уақытты қажет етеді», — деп мәлімдеді Абай облыстық сайлау комиссиясы.
Қала әкімдігінде атап өтілгендей, сайлаушылар үшін барлық жағдай жасалған: учаскелер пандустармен, тактильді бағыттағыштармен және арнайы белгілермен жабдықталған.
Семей — Қазақстанда облыс орталығы деңгейінде әкім тікелей сайланған алғашқы қала. Бұған дейін мұндай сайлаулар тек аудандық және ауылдық деңгейде өткізіліп келген.
Қалалар мен аудан орталықтарының әкімдерін тікелей сайлау жүйесіне көшу туралы шешімді Президент Қасым-Жомарт Тоқаев 2024 жылғы қыркүйектегі Қазақстан халқына Жолдауында жариялаған болатын. Мемлекет басшысы бұл қадамды елдің саяси жүйесін жаңғыртудың және азаматтардың билік институттарына сенімін арттырудың маңызды кезеңі деп атады.
Сайлау нәтижелерін Орталық сайлау комиссиясы заңда белгіленген мерзімде ресми түрде жариялайды. Явка жөніндегі деректер бүгін Орталық сайлау комиссиясы тарапынан ұсынылады.
