Аппарат отырысы: өзекті мәселелер қаралды
Шымкент қаласының әкімі Ғабит Сыздықбековтің төрағалығымен аппарат кеңесі өтіп, жиында білім беру саласын цифрландыру мәселелері, қала көшелерін асфальттау жұмыстарының нәтижелері қаралды.
Білім басқармасының басшысы Қуаныш Ыскаков қалада білім сапасын арттыру мақсатында басқарма және оған қарасты ұйымдардың қызметін толық цифрландыру бойынша кешенді жұмыс жүргізіліп жатқанын баяндады.
Атап айтқанда, ашықтықты қамтамасыз ету және сыбайлас жемқорлық тәуекелдерін төмендету мақсатында білім берудің барлық деңгейін, кадрлық, қаржылық және басқарушылық процестерді қамтитын бірыңғай интеграциялық «QARQYN» жүйесі енгізілді. Жүйе қолданыстағы ақпараттық платформалармен біріктірілген және ақпараттық қауіпсіздік талаптарына толық сәйкес келеді.
Сонымен қатар, мектепке дейінгі және қосымша білім беру саласында цифрлық шешімдерді енгізу нәтижесінде тәуекелдер анықталып, жойылды, бұл мемлекеттік шығындарды оңтайландыруға мүмкіндік берді. Ваучерлік қаржыландыруды талдау қорытындысы бойынша негізсіз есептеулер алынып тасталып, бюджет қаржысы үнемделді.
Сондай-ақ, білім беру ұйымдарының 34 мыңнан астам қызметкерін қамтитын «Sana» тарификациялық базасы енгізілді. Бұл жүйе оқу жүктемесінің артып кетуін, жасырын бос жұмыс орындарын және негізсіз қосымша төлемдерді анықтауға мүмкіндік беріп, кадрлық және қаржылық процестердің ашықтығын арттырады.
Қауіпсіздік пен тегін тамақпен қамтамасыз етуді ұйымдастыру мәселелеріне ерекше назар аударылды. Қаладағы барлық мектепте бейнебақылау және биометриялық бақылауды қамтитын «Айқын» интеллектуалды жүйесі енгізілді. Білім беру ұйымдары заманауи қауіпсіздік жүйелерімен жабдықталып, полицияның Жедел басқару орталығына қосылды. Ыстық тағаммен қамту жүйесін биометриялық есепке алу арқылы цифрландыру нәтижесінде 2025 жылы 540 млн теңге бюджет қаржысы үнемделді.
Кеңес барысында Жолаушылар көлігі және автомобиль жолдары басқармасының басшысы Ролан Ибрагимов 2025 жылғы цифрлық паспортизация қорытындысы бойынша қалада топырақ жолдардан асфальтқа толық көшу аяқталғанын хабарлады.
Қаладағы көшелер саны 6 882-ге жетіп, олардың жалпы ұзындығы 3 846,7 шақырымды құрады. Соңғы жылдары көшелер саны – 64 пайызға, ал көше-жол желісінің жалпы ұзындығы 18 пайызға артты. 2025 жылы Шымкент қаласында 1 059 шақырымнан астам автомобиль жолына асфальт төселді.
Көлік инфрақұрылымын дамыту аясында ірі жобалар жүзеге асырылуда. Атап айтқанда, А-2 айналма жолын қайта жаңарту жұмысының 90 пайызы аяқталды, Қонаев даңғылын ұзарту жұмысы жалғасуда, Момынов және Тіленшин көшелерінде автомобиль өткелдерінің құрылысы жүргізілуде. Аталған нысандарды биыл пайдалануға беру жоспарланып отыр. Сонымен қатар, көлік нөпірін азайту және қаланың аудандары арасындағы байланысты жақсарту мақсатында балама бағыттар салынды және жаңартылды, көшелерге күрделі және орташа жөндеу жүргізілді, сондай-ақ, ішкі орамдар мен шалғай аумақтардағы жолдарға асфальт төселген.
Жалпы, көше-жол желісін дамыту және жаңарту жұмыстары кезең-кезеңімен жалғасады. Кеңес қорытындысы бойынша қала әкімі білім беру саласындағы цифрландыру жобаларын іске асыруға бақылауды күшейтуді, бюджет қаражатының тиімді әрі мақсатты пайдаланылуын қамтамасыз етуді, сондай-ақ, көше-жол желісін дамыту бойынша жұмыстарды уақтылы әрі сапалы аяқтауды тапсырды.
Шымкент қаласы әкімінің баспасөз қызметі