Депутат Темір Қырықбаев балалардың жазғы демалыс лагерьлерінің қауіпсіздігі мен сапасына қатысты сауал жолдады
Мәжіліс депутаты, «AMANAT» партиясы фракциясының мүшесі Темір Қырықбаев ҚР Премьер-Министрінің орынбасары – Мәдениет және ақпарат министрі Аида Балаеваға балалардың жазғы лагерьлерінің жай-күйі туралы депутаттық сауал жолдады.
Депутат жыл сайын ондаған мың бала жазғы демалыс лагерьлерінде тынығатынын атап өтті. Оның айтуынша, бұл балалар үшін жаңа әсерлер мен достыққа толы маңызды кезең болуы тиіс. Сондықтан лагерьлердің сапалы жұмыс істеуі, балалардың қауіпсіздігі мен жан-жақты дамуына барлық жағдай жасау – мемлекеттің маңызды міндеті.
Қордаланған проблемалар
Соңғы жылдары балалар лагерьлерінде бірнеше даулы оқиғалар тіркелген:
Алматыдағы «Арман дала» лагерінде аумақта сауна, мейрамхана, компьютерлік клуб жұмыс істеген. Балалар еденде ұйықтаған, ұлдар мен қыздар бір бөлмеде орналасқан.
Маңғыстау облысындағы «Айналайын» лагерінде ( «Өзенмұнайгаз» қызметкерлерінің балалары үшін) орын тапшылығы салдарынан балалар екі адамнан бір төсекте немесе еденде ұйықтаған, қауіпсіздік нормалары өрескел бұзылған.
Түркістан облысындағы «Арман» лагерінен 400 бала ата-аналардың наразылығы мен нашар жағдайға байланысты мерзімінен бұрын эвакуацияланған.
Шымкенттегі «Үш бұлақ» лагерінде сыйымдылық нормасы асыра орындалған.
Бұл фактілер саланың жүйелі проблемалары бар екенін көрсетеді деп есептейді депутат.
Лицензиялау және «AMANAT» ұстанымы
«AMANAT» партиясының Сайлауалды бағдарламасында балалардың демалысының қауіпсіздігі мен сапасы маңызды бағыт ретінде белгіленген. Депутаттардың бастамасымен балалар лагерьлерін лицензиялау 2026 жылдың 1 сәуірінен бастап енгізілді.
«Заң бар, басымдық белгіленген. Ендігі міндет – осының барлығын нақты әрі тиімді іске асыру», – деді Темір Қырықбаев.
Депутат көптеген ата-аналардың шағымдарын да келтірді: мектеп жанындағы лагерьден басқа баланы жіберетін жер аз, жолдаманың бағасы қымбат, сапасына кепілдік жоқ, көбіне басқа өңірлерге жіберуге тура келеді.
Сұрақтар мен ұсыныстар
Темір Қырықбаев министрден мыналарды сұрады:
Мектеп жанындағы лагерьлерді есептемегенде, қандай білім беру-сауықтыру ұйымдары лицензиялаудан өтті және қызмет көрсетуге дайын?
Өңірлерді балалар демалысы ұйымдарымен қамтамасыз ету бойынша талдау жүргізіп, нақты ақпарат беру.
Сондай-ақ балалардың қауіпсіздігін қамтамасыз ету үшін мына шараларды қабылдауды ұсынды:
Лицензиялауға жатпайтын лагерьлерге тұрақты тәуелсіз мониторинг енгізу – бала құқықтары жөніндегі уәкілдер, жұртшылық және ата-аналар қауымдастығының қатысуымен.
Қауіпсіздік талаптарын бұзғаны үшін бақылаушы органдар басшылары мен лагерь иелерінің дербес жауапкершілігін күшейту.
Балалардың бос уақытын ұйымдастыруға бөлінетін бюджет қаражатын жұмсаудың ашықтығын қамтамасыз ету.
Депутат балалар лагері – тек демалыс орны емес, тұлға қалыптасатын, мінез шыңдалатын және әлеуметтік дағдылар дамитын маңызды орта екенін атап өтті.