Қауым мүшелігінің жауапкершіліктері қандай?

Мэтт Эмади

Мен әлі күнге дейін баскетбол командасының соңғы тізімінен өз атымды көргендегі қуанышымды ұмытпаймын. Мен іріктеуден өттім. Мектептегі баскетболға қабылдау аяқталды, команда жасақталды, ал менің атым тізімде тұрды. Маған аяқкиім берілді, форма кидім, команда киім ауыстыратын бөлмеден жеке шкаф алдым.

Енді нағыз еңбек басталатын еді: физикалық дайындық, жаттығулар, сапарлар, тағы да дайындық, ойындар, жазғы лагерьлер — және дайындықты тағы да айттым ба? Осы міндеттердің бәрі менің команда мүшесі ретіндегі рөлімді анықтады. Егер мен оларды қабылдамасам, командадағы орным мәнсіз болар еді, тіпті мүлде болмас еді.

Жеке-даралық пен тұтынушылық үстемдік еткен мәдениетте қауым мүшелерінің елеулі жауапкершіліктері бар деген ой кейбір мәсіхшілер үшін тосын болуы мүмкін. Алайда жауапкершілік пен қауым мүшелігі бір-бірімен тығыз байланысты — бірінсіз екіншісі болмайды. Негізінде, нақты бір топқа тиесілі болған әрбір адам сол топтың мүшесі болуымен-ақ жауапкершілік алады. Егер сейсенбі кешкі боулинг лигасына қатысып, сейсенбі сайын ойнауға келмесең, сен ол лиганың мүшесі емессің. Сол сияқты, қауымға қосылсаң, сенде де жауапкершіліктер бар.

Ендеше, қауым мүшелерінің жауапкершіліктері қандай?

Бұйрықтардан бұрын — ақиқаттар

Бұл сұраққа қалай жауап беретініміз алдымен жергілікті қауымды қалай анықтайтынымызға байланысты. Жергілікті қауым — бұл ғимарат немесе орын емес. Қауым — бұл адамдар. Нақтырақ айтсақ, жергілікті қауым — қайта туылған, Киелі Рухқа толы адамдардың Иеміз Иса Мәсіхтің атымен және Құдай Сөзінің билігі астында тұрақты түрде жиналып, шынайы Ізгі хабарды мойындап, қасиетті рәсімдер арқылы бір-бірінің Құдай Патшалығындағы азаматтығын бекітетін қауымы. Бұл анықтама күрделі көрінуі мүмкін. Бірақ ол қауым мен оның мүшелігі туралы екі маңызды шындықты көрсетеді: қауымның өзіндік болмысы бар және қауымның өзіндік өкілеттігі бар.

Қауым қайта туылған, Киелі Рухқа толы адамдардан тұрады. Олардың жаңа болмысы бар. Бұрын рухани өлі болса, енді Мәсіхте тірілді. Олар — жаңа жаратылыс, күнәлары кешірілген, Құдайдың балалары ретінде қабылданғандар (Ерм. 33:31–34; 2 Қор. 5:17; Ефес. 1:7, 13, 22; Рим. 8:15). Әрбір қауым мүшесі Ізгі хабарға лайық өмір сүріп, Мәсіхте кім болса, соған айналуға жауапты (Ефес. 4:1). Алдымен болмыс, содан кейін іс-әрекет. Яғни, Жаңа Өсиеттегі бұйрықтар Ізгі хабардағы ақиқаттардан туындайды.

Сонымен қатар Құдай жергілікті қауымдарға көктегі Патшалықтың атынан жер бетінде шешім қабылдау өкілеттігін тапсырды (Мат. 18:18). Жергілікті қауымдар — Құдай Патшалығының елшіліктері. Шомылдыру рәсімі, Иеміздің кешкі асы және тәртіп арқылы қауым біреудің Құдай Патшалығындағы азаматтығын растауға немесе жоққа шығаруға билік етеді. Бұл жауапкершілік тек жетекшілерге емес, бүкіл қауым мүшелеріне жүктелген.

Қауым мүшелігінің алты жауапкершілігі

Қауымның болмысы мен өкілеттігін ескере отырып, қауым мүшелерінің жауапкершіліктерін қалай сипаттаймыз? Төмендегі алты тармақ Киелі кітаптағы ілімді жинақтайды.

1. Бірге жиналу

Егер қауым мүшелері жиналмаса, қауым да болмайды. Яғни, Иеміз Иса Мәсіхтің атымен бірге жиналу — қауымды қауым ететін белгілердің бірі. Еврейлерге арналған хаттың авторы бірге жиналудан қалмауды өсиет етеді (Евр. 10:25). Әрбір қауым мүшесі Иеміздің күніндегі ғибадатты Құдай халқының арасында басты орынға қоюы керек.

Сонымен қатар, басқа да жиналыстар болуы мүмкін. Егер қауым мүшелер жиналыстарында бюджет бекітілсе, жаңа мүшелер қабылданса, тәртіп мәселелері қаралса немесе ілімдік ұстанымдар айқындалса, онда қауым мүшелерінің сол жиналыстарға қатысуы да — олардың жауапкершілігі.

2. Ізгі хабарды қорғау

Ізгі хабардың тазалығын сақтау тек пасторлардың ғана міндеті емес. Әрбір қауым мүшесі Ізгі хабарды қорғауға және растауға жауапты. Елші Пауыл Ғалатиядағы қауымдарға жазғанда, «басқа Ізгі хабарға» бұрылғаны үшін ақсақалдарды емес, қауымдардың өзін сынады (Ғал. 1:2, 6). Ол қауымның қателіктің еніп, Ізгі хабарды бұрмалауына жол бергені үшін жауапкершілік жүктеді (Ғал. 1:7). Әрине, әрбір мүше жүйелі теологияның барлық нәзік тұстарын меңгеруге міндетті емес, бірақ әрқайсысы Ізгі хабардың мәнін түсіндіріп, қорғай алуы тиіс. Елшілер әрбір сенуші Мәсіхте жетіліп, шынайы мен жалған ілімді айыра алады деп күткен (Ефес. 4:13–14; Фил. 1:9–10; 1 Жох. 4:1–6).

Практикалық тұрғыда бұл қауым мүшелері өз қауымының сенім мәлімдемесін білуі және түсінуі керек дегенді білдіреді. Әрбір мүше қауымдағы ілімнің сол мойындауға сай болуын қадағалауға жауапты. Бұл жауапкершілікті мойындағандар үшін жеке Киелі кітапты оқу тек жеке рухани тәрбие емес, сонымен бірге қауымдық мақсатқа да қызмет етеді: «Мен Киелі кітапты бүкіл қауым ілімде адал болып қалуы үшін оқимын». Әрбір мүше Ізгі хабарды қорғау жауапкершілігін қабылдағанда, бүкіл қауым пайда көреді. Олар шындықта жетіліп, Құдай Ұлы туралы білімде өздерін бірге дамытады (Ефес. 4:13).

3. Қауым мүшелігін айқындау

Қауым мүшелері жаңа мүшелерді қабылдауға да, шығарып жіберуге де жауапты. Иса қауым билігіне бағынудан бас тартқан тәубесіз бауырды басқа ұлт адамы немесе салық жинаушы ретінде санауды үйретті (Мат. 18:15–20). Қорынттықтарға арналған бірінші хатта елші Пауыл олардың арасында зұлымдыққа төзгені үшін қауымды қатты сөкті (1 Қор. 5:1–13). Олар қауым болып «Иеміз Иса Мәсіхтің атымен жиналғанда», азғындық жасаған адамды тәннің жойылуы үшін шайтанға тапсыруы керек еді (1 Қор. 5:4–5).

Қауым мүшелері бірігіп өз мүшелігін анықтайды. Шомылдыру рәсімі арқылы немесе басқа қауымнан ауысқан адамдарды қабылдау арқылы жергілікті қауым әлемге: «Бұл адам — Құдай Патшалығының азаматы», — деп куәлік етеді (Мат. 16:18–19; 18:17–20; 28:18–20). Иеміздің үстелі маңында үнемі қауымдасу арқылы мүшелер қауым мүшелігінің жалғасып тұрған белгісіне қатысып, жаңа келісімнің мүшелері екендерін бір-біріне растайды (1 Қор. 10:17; 11:23–26).

Тәртіп жағдайларында қауым тәртіпке салынған адамды енді Мәсіх Патшалығының азаматы әрі Оның денесінің мүшесі ретінде мойындамайтынын жария етеді (Мат. 18:15–20). Мұндай билікті пасторлар жалғыз қолданбайды. Қауымның тазалығы үшін және құлаған әлемде Ізгі хабар куәлігін сақтау мақсатында, бүкіл қауым Мәсіхке мойынсұнып, осындай шешімдер қабылдауы тиіс.

4. Бір-бірін сүю

«Егер бір-біріңді сүйсеңдер, барлық адамдар сендердің Менің шәкірттерім екендеріңді білетін болады» (Жох. 13:35). Қауым мүшелері бір-бірін сүюге жауапты деу — құстар ұшуға міндетті деумен бірдей. Құдай халқын сүю — Мәсіхтегі жаңа болмысымыздың белгісі (1 Жох. 4:7). Жаңа Өсиетте сүйіспеншілік нақты, белсенді және қызмет арқылы көрінеді. Әрбір қауым мүшесі Жаңа Өсиеттегі «бір-біріңе» қатысты өсиеттерді орындауға жауапты.

Егер бір-бірімізді сүю жауапкершілігін қабылдасақ, өзіміз шәкірт болуға да, өзгелерді шәкірт етуге де ұмтыламыз. Осылайша бүкіл қауым сүйіспеншілікте «өзін-өзі дамытады» (Ефес. 4:15–16). Біз қауым бірлігіне немқұрайды қарамаймыз, қайта тыныштық байланысындағы бірлікті сақтауға әрі дамытуға ынталы боламыз (Ефес. 4:3). Адасып жүргендерді тастап кетпей, олардың игілігі үшін іздейміз (Мат. 18:10–14). Дұғаға байыппен қараймыз (1 Сал. 5:16; Ефес. 6:18), бір-біріміздің ауыртпалығын көтереміз (Ғал. 6:2), қонақжайлық танытамыз (Рим. 12:13), өз мүддемізден бұрын өзгелердің мүддесін қоямыз (Фил. 2:4) және мәнді қарым-қатынастарды дамытуға тырысамыз.

Бұл қызмет тек пасторларға ғана арналмаған. Керісінше, Иса қауымда пасторларды мүшелерді өз жауапкершіліктерін орындауға және Мәсіх денесін дамыту қызметін атқаруға дайындау үшін қойды (Ефес. 4:11–12).

5. Ақсақалдарға бағыну

Еврейлерге 13:17 аятында мәсіхшілерге жетекшілеріне мойынсұнып, бағыну өсиет етіледі. Ақсақалдар — Мәсіхтің Өз қауымына берген сыйы. Олар — мінез-құлқы көркем, Жазбаны үйретіп, қолдануға қабілетті адамдар (1 Тім. 3:1–7). Қауым мүшелері Исаны тыңдап, ақсақалдарға бағынуға жауапты, өйткені олар жандар үшін жауап беретіндер ретінде күзетеді (Евр. 13:17). Әрине, қауым мүшелері ақсақалдардың соңынан соқыр түрде ермеуі тиіс, бірақ олар Киелі жазбаларға сай үйретіп, қауымды библиялық жолмен басқарып отырса, олардың даналығына, кеңесіне және нұсқауына мойынсұнуы керек.

6. Жоғалғандарды ізгі хабарлау

Ұлы тапсырма тек пасторлар мен шетелдік миссионерлерге ғана емес, әрбір мәсіхшіге арналған. Иса әрбір қауым мүшесін «шәкірт дайындауға» жіберді (Мат. 28:18–20). Құдаймен татуластырылған халық ретінде біз Мәсіхтен бөлек, Құдайсыз және үмітсіз жүрген адамдарға татуласу хабарын жариялауға жауаптымыз (2 Қор. 5:19; Ефес. 2:12). Қауым — Құдайдан адамзатқа өкілетті жариялау жасауға шақырылған патшалық діни қызметкерлер (1 Пет. 2:9). Біз қоғамдық жиналыстарда Мәсіхтегі Құдай Патшалығын жариялаймыз және шашырап, сол шындықты жоғалған әлемге жеткіземіз: Мәсіх — Патша! Тәубе етіңдер және Оған сеніңдер.

Қорытынды

Ешбір спортшы командаға әр жаттығу мен ойынның шетінде отыру үшін қосылмайды. Қауым мүшелігі командалық спортқа қатысудан әлдеқайда маңызды. Бірақ өкінішке қарай, жеке-даралық, тұтынушылық, жеңіл сенім және библиялық емес қауым басқару үлгілері көптеген қауым мүшелерін әдейі немесе байқамай шетке ысырып тастады.

Сен қауым мүшесісің бе? Қосалқы орындықпен шектелме. Иса барлығымызды орнымыздан тұрып, іске кірісуге шақырады.

Түпнұсқасы: https://www.9marks.org/article/what-are-the-responsibilities-of-church-membership/