Аппарат отырысы: өзекті мәселелер қаралды
10 қарашада қала әкімі Ғабит Сыздықбековтің төрағалығымен аппарат отырысы өтті. Отырыс барысында жылыту маусымында қауіпсіздікті қамтамасыз ету, газбен улану және басқа да төтенше жағдайлардың алдын алу жөніндегі шаралар, сондай-ақ, жаппай сырғанауға арналған мұз алаңдарын, қысқы демалыс қоғамдық аймақтарын ұйымдастыру, қаланы жаңа жылдық безендіру тұжырымдамасы қаралды.
Қалалық орта сапасы және бақылау басқармасының басшысы Мерлан Керімжановтың айтуынша, жеке үйлердегі иіс газынан уланудың негізгі себептері газ жабдықтарының дұрыс жұмыс істемеуі және жуынатын бөлмелерде газ су жылытқыштарын орнату болып табылады.
Көп пәтерлі үйлердегі негізгі себептер – газ құрылғыларын желдету арналарына қосу және мұржалардың бітелуі. Осы мәселелерді шешу үшін үй ішіндегі газ жабдықтарына қызмет көрсету, сондай-ақ, мұржалар мен желдету арналарын бір рет тазалайтын компанияларды анықтауға конкурс өткізілетін болады.
Көп пәтерлі үйлердегі коммерциялық жайларда газ баллондарын пайдаланудың алдын алу мақсатында газтехникалық қызмет Төтенше жағдайлар департаментімен бірге кәсіпкерлер арасында түсіндіру және алдын алу жұмыстарын жүргізуде. Бүгінгі таңда 355 нысан тексеріліп, 7 тұрмыстық газ баллоны анықталды. Баллондар тәркіленіп, шаралар қабылданды, тәртіп бұзушыларды жауапқа тарту жұмысы жүргізілуде.
Мәдениет, тілдерді дамыту және архивтер басқармасының басшысы Бауыржан Орынтаев Шымкентте жаңа жылды мерекелеуге арналған 20 мәдени іс-шара өткізу жоспарланғанын баяндады. Басты мерекелік іс-шара 18 желтоқсанда өтіп, Астана алаңында қаланың басты шыршасы салтанатты түрде жағылады.
Сол күні мерекелік шамдар қаланың бес ауданының барлығындағы Наурыз, Әл-Фараби, Алатау, Тұран алаңдарында және Абай саябағында бір мезгілде жағылады. Мерекелік бағдарламада Аяз Ата мен Ақшақардың шеруі, балаларға арналған театрландырылған қойылымдар мен ертеңгіліктер, шығармашылық ұжымдардың қойылымдары жоспарланған.
Қала тұрғындары мен қонақтары үшін жаппай сырғанауға арналған мұз алаңдары да ұйымдастырылады. Жаңа жылдық мерекелер 31 желтоқсан күні танымал отандық орындаушылар қатысатын Астана алаңындағы гала-концертпен және мерекелік отшашумен аяқталады.
Жиын қорытындысы бойынша қала әкімі жылу беру маусымындағы қауіпсіздікті қамтамасыз ету жөніндегі шараларды күшейтуді, үй ішіндегі газ құрылғылары мен мұржалардың жай-күйіне бақылау жүргізуді, сондай-ақ, жаңа жылдық іс-шараларды өткізуге сапалы дайындықты қамтамасыз етуді тапсырды.
Шымкент қаласы әкімінің баспасөз қызметі