Атырау облысында құтқарушы жұмыс барысында көз жұмды
Өрт сөндіру қызметкері Құлсарыда су сору жұмыстары кезінде қайтыс болған.
"29 мамырда Атырау облысы Жылой ауданының Құлсары қаласында су сору бойынша авариялық-құтқару жұмыстарын жүргізу барысында Атырау облысы ТЖД №1 мамандандырылған өрт сөндіру бөлімінің бөлімше командирі 2001 ж.т. азаматтық қорғау сержанты Бейбарыс Жалғасбайұлы Рақым қайтыс болды. Оқиғаның мән-жайы анықталуда", - деп жазылды Төтенше жағдайлар министрлігінің Telegram-арнасында.
Сондай-ақ онда қаза тапқан өрт сөндірушінің отбасына жан-жақты көмек пен қолдау көрсетілетіні айтылған.
"Төтенше жағдайлар министрлігі Бейбарыс Жалғасбайұлының туыстары мен жақындарына көңіл айтады. Ол өз ісінің кәсіби маманы ретінде есімізде мәңгі қалады", - делінген хабарламада.