«Банктер туралы» заң жобасына түзету қабылданды

Бүгін Мәжіліс депутаты Тимур Қырықбаев Facebook парақшасында «Банктер туралы» заң жобасын қараған жұмыс тобының отырысында маңызды түзету қабылданғанын жазды.

Онда түзету банктерге қаржылық жағдайы дәлелденбеген немесе несие алушыға қатысы жоқ жеке тұлғалардың жеке кепілгерлігін талап етуге тыйым салуды көздейтіні туралы жазылған.

“Қазіргі таңда жеке кепілгерлік көп жағдайда банктер қолданатын ауыр әрі әділетсіз тәжірибеге айналды. Несие ала алмай отырған азаматтың туыстары мен таныстары олардың орнына төлем жасау мүмкіндігі болмағанына қарамастан, артық міндеттемелерге қол қоюға мәжбүр болуы жиілеп кетті. Мұндай жағдайлар кейін кепілгерлерге үлкен ауыртпалық түсіріп, олардың өмірін күрделендіреді. Әсіресе телефон арқылы қашықтан рәсімделетін кепілгерлік кезінде адам өзіне алған міндеттеменің көлемін толық түсінбей қалады”,-деді Мәжілісмен.

Осыған байланысты ол «Банктер туралы» Заңның 54-бабына өзгерістер ұсынды. Енді банк кепілгерлік немесе кепіл рәсімдеу кезінде кепілгердің қаржылық жағдайын ескере отырып, оның төлем қабілеттілігіне міндетті түрде бағалау жүргізуге, сондай-ақ негізгі қарыз бен ұсынылған қамтамасыз ету құнының айырмасы бойынша міндеттемені қабылдауға кепілгердің жазбаша келісімін алуға тиіс.

Егер ұсынылған қамтамасыз ету банктің кепіл саясатының талаптарына сәйкес кепіл шарты жасалған кезде негізгі міндеттемені толық көлемде қамтамасыз етсе, банк жеке тұлғадан қосымша кепілгерлік немесе кепіл талап етуге құқылы емес.

Депутат ұсынған түзетуге әріптестері Б.Базарбек пен А.Баққожаев та қол қойды. Халық қалаулысы жұмыс барысы туралы алдағы уақытта да ақпарат беріп отыратынын жеткізді.